بسم الله الرحمن الرحيم
من القصائد الرائعة للمرحوم الشاعر/محمد الغيث البشير الشمري
وصديقه الرائع الشاعر/عثمان المجراد...
اللذان تغنا كثيراً في عشق حائل...
قصيدة محمد الغيث
(رحمه الله)
بعنوان (ماأقدر)
عثمان اجيك.. وشفتي من لهفتي تنثر شعر
وارحل واسافر واغترب عن خطوتي في عوقها
اجي وانا كلي رثاء..كلي حزن..كلي سهر
وارحل وهامة للسحاب.. انت وانا من فوقها
اجي هنا.. وارحل هنا .. واقف هنا وهنا استمر
مثل السناء..بعمر السنة اجي مابين شقوقها
عثمان هذي رحلتي..يمك اجي حرف وسطر
وعيني تشوفك داخلي.. هذا انا؟ لا شوقها
واشبهك.. ماقدر على وصفٍ حروفه.. تعتذر
لكن مثل شمس النهار.. لاوالله انت شروقها
احب فيك كل شيء..كل شيء.. حتى الغدر
وغدرك وفاء.. والله وفاء.. وعين الوفا لك موقها
ابيك..لاشتد الهجير في مهمهه وارض قفر
ثم دق ناقوس الخطر.. بان الهلع.. بفلوقها
ابيك.. بالليل الاسيل.. تحت المساء فوق الفجر
وابيك " مركأ مرجلة " يازين فيك طروقها
شق الورق يا شاعره.. شف هالقلم ضاق وضجر
يصرخ على جارك.. هدوء.. خله يكمل سوقها
وتصير شكوتنا سوى.. شكوة بكى هذا القدر
أشكي عليك ابشتكي" ياعين جدي" ذوقها
أشكي ظلام بالشموس.. وابكي حبيبة تحتظر
هذا جنون اهدابها.. ينشر حنان.. خفوقها
غصب يشوفه ناظري.. في كل ساحات النظر
أشوف نفسي دمعته.. واصيح انا معشوقها
احبها كثر الحزن.. كثر الثواني في الدهر
أكثر من حروف العذر كثر الشقاء في طوقها
من زينها قال الزمان لحظّها.. وش تنتظر؟
ارحل وبعثر خطوتك.. وإمح الحلى بخلوقها
عثمان: امسح دمعته..لا..خلها.. دمعة حذر
لا تمسحه خله.. ترى طبع البشر.. منطوقها
ليت الورق.. خد السماء.. ليت القلم حبره بحر
نكتب قصايدنا غزل.. نشوة أمل.. مافوقها
( محمد بن غيث البشيــر ــ جدة 1993م)
وهذا رد عثمان المجراد
بعنوان (صاح القلم)
معذور أزهب عدتي.. مجبور أطالع للصور
والى تمعنت النظر..اصيح بك.. يا ضوقها
ياضوقها غصب اصيح.. وشلون اجاري هالدرر
شعرك بحر.. شعرك عصا للي تبيع حلوقها
قصيدتك فيها الشموخ..قصيدتك فيها الفخر
تنزف محبة للثرى.. هيل وصهيل طروقها
قريتها حرف... وسطر.. عشقتها جذع وبذر
ابياتها اللي باسقة.. يازين طعم عذوقها
فيك الوفاء طبع ورضاع، فيك البداوة والحضر
فيك ابتسامة ديرتي..لمحت فيك دقوقها
محمد.. ترى السلعة ذهب.. عمر الذهب ما يندثر
لاجيتها لا تندهش..بس امسح اللي فوقها
بس البس الغيمة عباة.. بس انثر الدمعة زهر
لا تلتفت للي شكى.. يعلن بزوغ عقوقها
دنياك هذي زايلة.. لا بد تترك لك اثر
اجمع شتات المحبرة.. مثلك يجيب حقوقها
ارحل مع الفكرة مدى.. وارسم مع الكلمة عمر
وابصم على خد الورق.. غيرك تراه يبوقها
تشكي على صحراء وضما.. تسند علي يابن المطر
طلح وجفاف.. وغيمتي.. عجزت اشوف بروقها
في رحلتك.. ترني معك..الدرب عالي ما انحدر
يمكن نموت من العطش..يمكن سوى نذوقها
من يمسح الدمعة..انا.. من يجبر اللي انكسر
وش خانة الدمعة..اذا ما تنتخي بعروقها
حبيبتك .. وان شفتها..تبكي بدمع من جمر
لا تنتظرها تحتظر..انزع قديم سبوقها
احبها.. بس لا تغار.. وشلون اوصلها الخبر
خل انتبارى بحبها .. ونفتح سوى صندوقها
نزفها بليل ومطر.. ونضمها بشمس ووعر
ونشيلها فوق الجراح... حتى تطيب فتوقها
ونكتب بها مدح وغزل .. نجعل قصايدنا مهر
ومهما كتبنا صاحبي: صاح القلم... يا ضوقها
عثمان سالم المجراد ( 1993م)
موضوع: مذا قالوا هذان الشاعران عن حائل